Biblia católica - Liber Ecclesiasticus 26

Liber Ecclesiasticus, 26

¹ Mulieris bonæ beatus vir: numerus enim annorum illius duplex.

² Mulier fortis oblectat virum suum, et annos vitæ illius in pace implebit.

³ Pars bona mulier bona, in parte timentium Deum dabitur viro pro factis bonis:

⁴ divitis autem et pauperis cor bonum, in omni tempore vultus illorum hilaris.

⁵ A tribus timuit cor meum, et in quarto facies mea metuit:

⁶ delaturam civitatis, et collectionem populi:

⁷ calumniam mendacem super mortem omnia gravia:

⁸ dolor cordis et luctus, mulier zelotypa.

⁹ In muliere zelotypa flagellum linguæ, omnibus communicans.

¹⁰ Sicut boum jugum quod movetur, ita et mulier nequam: qui tenet illam quasi qui apprehendit scorpionem.

¹¹ Mulier ebriosa ira magna, et contumelia: et turpitudo illius non tegetur.

¹² Fornicatio mulieris in extollentia oculorum, et in palpebris illius agnoscetur.

¹³ In filia non avertente se, firma custodiam, ne inventa occasione utatur se.

¹⁴ Ab omni irreverentia oculorum ejus cave, et ne mireris si te neglexerit.

¹⁵ Sicut viator sitiens ad fontem os aperiet, et ab omni aqua proxima bibet, et contra omnem palum sedebit, et contra omnem sagittam aperiet pharetram donec deficiat.

¹⁶ Gratia mulieris sedulæ delectabit virum suum, et ossa illius impinguabit.

¹⁷ Disciplina illius datum Dei est.

¹⁸ Mulier sensata et tacita, non est immutatio eruditæ animæ.

¹⁹ Gratia super gratiam mulier sancta et pudorata.

²⁰ Omnis autem ponderatio non est digna continentis animæ.

²¹ Sicut sol oriens mundo in altissimis Dei, sic mulieris bonæ species in ornamentum domus ejus.

²² Lucerna splendens super candelabrum sanctum, et species faciei super ætatem stabilem.

²³ Columnæ aureæ super bases argenteas, et pedes firmi super plantas stabilis mulieris.

²⁴ Fundamenta æterna supra petram solidam, et mandata Dei in corde mulieris sanctæ.

²⁵ In duobus contristatum est cor meum, et in tertio iracundia mihi advenit:

²⁶ vir bellator deficiens per inopiam ; et vir sensatus contemptus ;

²⁷ et qui transgreditur a justitia ad peccatum: Deus paravit eum ad rhomphæam.

²⁸ Duæ species difficiles et periculosæ mihi apparuerunt: difficile exuitur negotians a negligentia, et non justificabitur caupo a peccatis labiorum.

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: