Biblia católica - Liber Ecclesiasticus 36

Liber Ecclesiasticus, 36

¹ Miserere nostri, Deus omnium, et respice nos, et ostende nobis lucem miserationum tuarum:

² et immitte timorem tuum super gentes quæ non exquisierunt te, ut cognoscant quia non est deus nisi tu, et enarrent magnalia tua.

³ Alleva manum tuam super gentes alienas, ut videant potentiam tuam.

⁴ Sicut enim in conspectu eorum sanctificatus es in nobis, sic in conspectu nostro magnificaberis in eis:

⁵ ut cognoscant te, sicut et nos cognovimus quoniam non est deus præter te, Domine.

⁶ Innova signa, et immuta mirabilia.

⁷ Glorifica manum et brachium dextrum.

⁸ Excita furorem, et effunde iram.

⁹ Tolle adversarium, et afflige inimicum.

¹⁰ Festina tempus, et memento finis, ut enarrent mirabilia tua.

¹¹ In ira flammæ devoretur qui salvatur: et qui pessimant plebem tuam inveniant perditionem.

¹² Contere caput principum inimicorum, dicentium: Non est alius præter nos.

¹³ Congrega omnes tribus Jacob, ut cognoscant quia non est deus nisi tu, et enarrent magnalia tua, et hæreditabis eos sicut ab initio.

¹⁴ Miserere plebi tuæ, super quam invocatum est nomen tuum, et Israël quem coæquasti primogenito tuo.

¹⁵ Miserere civitati sanctificationis tuæ, Jerusalem, civitati requiei tuæ.

¹⁶ Reple Sion inenarrabilibus verbis tuis, et gloria tua populum tuum.

¹⁷ Da testimonium his qui ab initio creaturæ tuæ sunt, et suscita prædicationes quas locuti sunt in nomine tuo prophetæ priores.

¹⁸ Da mercedem sustinentibus te, ut prophetæ tui fideles inveniantur: et exaudi orationes servorum tuorum,

¹⁹ secundum benedictionem Aaron de populo tuo: et dirige nos in viam justitiæ, et sciant omnes qui habitant terram quia tu es Deus conspector sæculorum.

²⁰ Omnem escam manducabit venter: et est cibus cibo melior.

²¹ Fauces contingunt cibum feræ, et cor sensatum verba mendacia.

²² Cor pravum dabit tristitiam, et homo peritus resistet illi.

²³ Omnem masculum excipiet mulier: et est filia melior filia.

²⁴ Species mulieris exhilarat faciem viri sui, et super omnem concupiscentiam hominis superducit desiderium.

²⁵ Si est lingua curationis, est et mitigationis et misericordiæ: non est vir illius secundum filios hominum.

²⁶ Qui possidet mulierem bonam inchoat possessionem: adjutorium secundum illum est, et columna ut requies.

²⁷ Ubi non est sepes, diripietur possessio: et ubi non est mulier, ingemiscit egens.

²⁸ Quis credit ei qui non habet nidum, et deflectens ubicumque obscuraverit, quasi succinctus latro exiliens de civitate in civitatem?

Notas:

Edição da bíblia em vulgata clementina produzida a partir de papiros, manuscritos e códices gregos antiquíssimos. Recomenda-se ler a tradução em português da vulgata pelo padre Matos Soares.

Produtos recomendados: